Marcus Rashford yishimiye kugaruka mu ikipe y'igihugu y'Ubwongereza
Umutoza w'ikipe y'igihugu y'Ubwongereza Thomas Tuchel amaze guhamagara urutonde rw'abakinnyi 26 bazakoreshwa mu mikino yo gushaka itike y'igikombe cy'Isi, Marcus Rashford yagaragaye muri urwo rutonde nyuma y'igihe kitari gito adahamagarwa.
Ikipe y'igihugu y'Ubwongereza izakina imikino ibiri mu gushaka itike y'igikombe cy'Isi cya 2026. Ni imikino bazakina na Albania ndetse na Latvia. Tomas Tuchel uheruka guhabwa akazi ko gutoza iyi kipe yahamagaye abakinnyi bazifashishwa muri iyo mikino.
Urutonde rw'abakinnyi bahamagawe ni:
Abazamu: Dean Henderson (Crystal Palace), Jordan Pickford (Everton), Aaron Ramsdale (Southampton), James Trafford (Burnley).
Ba myugariro : Dan Burn (Newcastle United), Levi Colwill (Chelsea), Marc Guehi (Crystal Palace), Reece James (Chelsea), Ezri Konsa (Aston Villa), Myles Lewis-Skelly (Arsenal), Tino Livramento (Newcastle United), Jarell Quansah (Liverpool), Kyle Walker (AC Milan )
Abakina hagati mu kibuga: Jude Bellingham (Real Madrid), Eberechi Eze (Crystal Palace), Jordan Henderson (Ajax), Curtis Jones (Liverpool), Cole Palmer (Chelsea), Declan Rice (Arsenal), Morgan Rogers (Aston Villa).
Ba rutahizamu: Jarrod Bowen (West Ham United), Phil Foden (Manchester City), Anthony Gordon (Newcastle United), Harry Kane (Bayern Munich), Marcus Rashford (Aston Villa) Dominic Solanke (Tottenham Hotspur).
Akibona ko yahamagawe, Marcus Rashford waherukaga gukinira Ubwongereza mu mwaka ushize wa 2024 muri Werurwe ubwo batsindwaga na Brazil igitego kimwe ku busa mu mukino wa gishuti yagize ati '' Ntukareke kugira icyizere. Si njye nzabona umunsi ugeze ngo dutangire.''
Thomas Tuchel amuvugaho yagize ati " Kuri Marcus, ni umukinnyi usanzwe mu ikipe y'igihugu uretse ko ari ibihe byatandukanye, ndatekereza ko yagiye akora impinduka muri Aston Villa nubwo inshuro nyinshi yavaga ku ntebe y'abasimbura. Ibyo yakoze ntibisanzwe, uburyo akora cyane, haba mu gufasha mu kugarira ndetse no mu gushaka ibitego, ni byiza. Ndiyumvamo ko byari ngombwa kumuhamagara akaza akongera gusubira mu bihe bye byiza, uyu mwiherero w'ikipe y'igihugu uzamufasha cyane.''
Ibindi byaranze uku guhamagara kwa Thomas Tuchel, ni igaruka na none rya Jordan Henderson w'imyaka 34 mu ikipe y'igihugu. Jordan Henderson uyu munsi ukinira Ajax na we yari amaze igihe atagaragara mu ikipe y'igihugu. Myles Lewis Skelly wa Arsenal na we yahamagawe ku nshuro ya mbere mu ikipe nkuru y'igihugu.
