Urutonde rw’abagore umunani Bob Marley yabyaranye na bo

Uyu mugabo ukomoka muri Jamaica yitabye Imana ku wa 11 Gicurasi 1981 afite imyaka 36, azize indwara yitwa ‘Melanoma’, ikaba imwe bu bwoko bwa Kanseri y’Uruhu yakwiriye umubiri we.

Reka tugaruke kuri amwe mu mateka yaranze Bob Marley by’umwihariko ku bagore yabyaranye na bo, n’amazina y’abana be.

Ku wa 10 Gashyantare 1966, Bob Marley yashyingiranwe n’uwitwa Rita Marley ukomoka muri Cuba, ndetse uyu ni we mugore w’isezerano w’uwo muhanzi nubwo agatima ke kakomeje kurehareha akabyarana n’abandi bagore benshi na nyuma yo kurushinga.

Babyaranye abana barimo Cedella Marley wavutse mu 1967, David Ziggy Marley wavutse mu 1968, na Stephen Marley wavutse mu 1972. 

Nyuma uwo mugore yabyaye undi mwana witwa Stephanie Marley wavutse mu 1974, gusa Bob Marley yizeraga ko uwo mugore yamubyaranye n’undi mugabo nubwo yemeye kumurera nk’umwana we ndetse akamuha izina rye nk’abandi yabyaye.

Mu 1972 Bob Marley yabyaranye n’undi mugore witwa Pat Williams ukomoka muri Jamaica, umwana wabo bamwita Robbie Marley. Uwo mwaka ni nabwo uwo muhanzi yabyaranye n’uwitwa Janet Hunt (Janet Bowen) na we wo muri Jamaica, umwana wabo yitwa Rohan Marley.

Bob Marley yumvise bidahagije, mu 1978 abyarana na Cindy Breakspeare wabaye Nyampinga w’Isi mu 1976, umwana wabo bamwita Damian Marley. 

Muri uwo mwaka uwo mugabo yakomeje kubyara yivuye imuzi, Anita Belnavis wo muri Jamaica babyarana umwana witwa Ky-Mani Marley. Byaje kumenyekana ko no mu 1973 yabyaranye n’undi mugore wo muri Jamaica witwa Janet Dunn, umwana wabo bamwita Karen Marley.

Mu 1975 nabwo yari yarabyaranye n’uwitwa Geraldine Khawly , umwana w’umuhungu witwa Julian Marley. Bob Marley amaze gupfa mu 1981, byamenyekanye ko hari undi mugore yasize ateye inda gusa we ntihamenyekana imyirondoro ye, ndetse umwana avuka se yarapfuye.