Nigeria: Rurageretse mu nkiko hagati y’Umuhanzikazi Mercy Chinwo n’uwo ashinja kumusebya
Urukiko rwo mu Karere ka Wuse Zone 6 i Abuja muri Nigeria rwategetse ko uwitwa Very Dark Man (VDM) ku mbuga koranyambaga atabwa muri yombi, kubera gusebya umuhanzikazi w’indirimbo zo kuramya no guhimbaza Imana, Mercy Chinwo.
Hafashwe uyu mwanzuro nyuma y'uko VDM yanze kwitaba urukiko ku birego yashinjwaga. Umucamanza Emmanuel Iyanna yasohoye itegeko ryo guta muri yombi VDM kuri uyu 13 Werurwe 2025.
Iri tegeko ryafashwe nyuma y'uko VDM atitabiriye urubanza yari yahamagajwemo ku wa 5 Werurwe 2025. Mu bihe bitandukanye, VDM yagiye yifashisha imbuga nkoranyambaga akavuga ko Umuhanzikazi Mercy Chinwo yatwaye amafaranga 345.000$ y’uwitwa Ezekiel Onyedikachukwu (Eezee Tee) warebereraga inyungu ze mu muziki.
Mercy Chinwo yahakanye ibi birego anatanga ibimenyetso birimo inyandiko zo kuri Email n’ibindi byerekana ko atigeze atwara ayo mafaranga, anafata icyemezo cyo kujyana VDM mu nkiko ndetse asaba indishyi ya miliyari 1.1 y’amafaranga akoreshwa muri Nigeria.
Chinwo kandi ashaka ko VDM asiba ibyo yanditse ku mbuga nkoranyambaga bimusebya, akanasaba imbabazi ku mugaragaro. Mu gihe ibi kuba, Eezee Tee nawe afite urubanza rwe i Lagos aho akurikiranyweho icyaha cy’uburiganya.
