Mu Rwanda humvikanye umutingito ufite ubukana bwa 6.4
Urwego rw’Igihugu rushinzwe Mine, Peteroli na Gaz (RMB), binyuze mu Ishami ryarwo rishinzwe gusuzuma imitingito no kwinyeganyeza kw’isi, rwatangaje ko umutingito ufite ubukana bwa 6,4 wumvikanye mu bice bitandukanye by’u Rwanda, utaturutse muri Tanzania.
Uyu mutingito wamaze amasegonda 30, wumvikanye saa 11:20 zo kuri uyu wa Kane tariki 5 Ugushyingo 2026.
RMB yasobanuye ko uwo mutingito wabereye hafi y’agace ka Ushirombo muri Tanzania, ku ntera y’ibilometero 292 uvuye mu Mujyi wa Kigali.
Uru rwego rwatangaje ko nubwo uwo mutingito wumvikanye mu bice bitandukanye by’u Rwanda, nta ngaruka wateje ku bikorwaremezo cyangwa ibindi mu gihugu.
Imitingito ishobora kumvikana mu bihugu bitandukanye bitewe n’ubukana bwayo n’intera y’aho yabereye, ku buryo n’iyo yaba iri mu kindi gihugu ishobora kumvikana no mu bice biri kure y’aho yakomotse.
Umutingito wo kuri uyu wa Kane wongeye kwibutsa ko u Rwanda ruherereye mu gace k’Isi gashobora kwibasirwa n’imitingito, bitewe n’imiterere y’ubutaka n’imigendekere y’ibice bigize ubutaka byo mu Karere k’Ibiyaga Bigari.
Si ubwa mbere umutingito wumvikanye mu Rwanda muri uyu mwaka. Waherukaga ku wa 27 Nzeri 2026, aho wo wari ku gipimo cya 4.0.
