M23 yakuye Ingabo zayo mu Mujyi wa Walikale
Ihuriro AFC/M23 rirwanya ubutegetsi bwa Repubulika Iharanira Demokarasi ya Congo, ryatangaje ko ryavuye mu Mujyi wa Walikale no mu bice biwukikije, mu Ntara ya Kivu y’Amajyaruguru.
Umuvugizi wa AFC/M23, Lawrence Kanyuka, kuri uyu wa 22 Werurwe yatangaje ko kugira ngo ibiganiro bya politiki bibe mu mwuka mwiza, abarwanyi babo bafashe icyemezo cyo kuva muri uyu mujyi no mu nkengero zawo.
Kanyuka yasabye abaturage bo muri uyu mujyi n’abayobozi babo gufata ingamba zo kwirindira umutekano no kurinda imitungo yabo, nyuma y’aho abarwanyi babo bawuvuyemo.
AFC/M23 yateguje ko ihuriro ry’ingabo za Leta ya RDC niryongera kugaba ibitero ku basivili no ku birindiro byayo, irisubira kuri iki cyemezo, igasubirana uyu mujyi.
Abarwanyi ba AFC/M23 bari bigaruriye umujyi wa Mubi ubarizwa muri Teritwari ya Walikale itarwanye, ikaba ari Centre y'ubucuruzi ibarizwamo ibirombe byinshi by'amabuye y'agaciro azwi nka Gasegereti.
Aba barwanyi bafashe Walikale tariki ya 19 Werurwe 2025 n’Ikibuga cy’Indege gito cya Kigoma nyuma yo gufata ibindi bice biwukikije birimo Ngora, Kisima na Mubanda.
Brig Gen Justin Gacheri Musanga ni we wayoboye urugamba rwa AFC/M23 rwo gufata umujyi wa Walikale.
