Ibintu 10 umuhanzi ukiri muto akwiriye kwitaho no gukurikiza
Umuhanzi cyangwa undi umuntu uwo ari wese ukeneye gutera imbere hari ibintu aba akwiye kwitaho bizamufasha kubaka ubwami bwe bukabaho igihe kirekire.
Kuba umuhanzi ni ubushabitsi nk’ubundi busaba kwitonda cyane no gutegura inzira uzanyuramo cyangwa izagufasha kubaka ubuhanzi bwawe ukamenya ibyo ukora n’ibyo wiranda.
Muri iyi nkuru tugiye kurebera hamwe ibintu 10 umuhanzi ukiri muto akwiye kwitaho mbere y’uko atangira urugendo rwa muzika gusa nanone n’uwabitangiye ibi birakureba.
Menya impamvu ukunda umuziki ushaka no kuwukora
Igihe cyose ushaka kuba umuhanzi, banza wibaze impamvu ushaka kubikora.
Ese ni ubucuruzi no gushaka amafaranga? cyangwa Ugamije kwamamara ?.
Usibye mu muziki no mu buzima busanzwe kuba uzi impamvu yawe bifasha kugira umurongo uhamye mu byo ukora.
Shyira imbaraga mu myitozo no gukura mu bumenyi
Umuziki si ukugira ijwi ryiza gusa, ugomba kwitoza buri gihe, kumenya kwandika indirimbo, gutunganya amajwi no kumenya iby'ibanze ku muziki nyarwanda n’uw’isi.
Hitamo umwimerere wawe mubyo ukora
Ni ingenzi guhitamo aho wifuza kuganisha umwimerere wawe: Afrobeat?, RnB?, Hip Hop?, Gospel? birafasha cyane mu buryo bwo gukuza umuziki wawe no kugira abawukunda bigendanye n'inzira wihaye urugero rufatika.
Koresha imbuga nkoranyambaga
Muri ibi bihe aho Isi igeze umuhanzi utagira imbuga nkoranyambaga aba asa n’utagaragara mu Isi.
Fungura konti kuri Instagram, YouTube, TikTok na Facebook, n'izindi mbuga nkoranyambaga ushyireho ibikorwa byawe, indirimbo n’ubutumwa bugomba gushishikaza abakunzi ba muzika.
Kubaka umubano n’abandi banyamwuga
Shaka abatunganya indirimbo (producers) beza, abacuranzi, abanditsi n’abanyamakuru b’imyidagaduro ndetse n’abakoresha imbuga nkoranyambaga.
Ibi bizagufasha kumenya ibigezweho, kubona amahirwe yo gukorana n’abandi no kwagura izina ryawe.
Tegura uburyo bwo gushora no gucunga amafaranga make ufite
Umuziki usaba ishoramari rigari, amafaranga yo gukora indirimbo, amashusho, kwamamaza n’ibindi.
Tangira uko ushoboye, ariko utegure ingengo y’imari wige no kuyicunga neza.
Ushobora no gushaka abaterankunga cyangwa abahagararira inyungu zawe.
Kubaka ikipe mukorana cyangwa umujyanama wihariye ndetse ufite ubumenyi mubyo urimo.
Gira kwihangana, umutima ukomeye no kudacika intege
Abahanzi benshi bakomeye uzasanga baragerageje gukora cyane kandi inshuro nyinshi mbere yo kumenyekana, gusa muri uko gukora cyane sibwo umuhanzi ahita yamamara bitwara igihe kinini ndetse bigakurikirana no gutenguhwa cyangwa guhemukirwa n’abantu bamwe bamwe.
Icy'ingenzi ni ukutadohoka no gukomeza gutera intambwe, wigira ku makosa yawe, ugakosora aho wananiriwe.
Ibi byose bikurikirwa no guhura n’abantu bakwibasira cyangwa baguca intege ku mbuga nkoranyambaga mutaziranye cyangwa se batanakuzi.
Ibi iyo ubyitayeho cyane wisanga wahuye n’ikibazo cy’uburwayi bwo mu mutwe.
Kugira aho ukura ibigutunga muzima bwo hanze y’umuziki
Ishoramari ryo mumuziki riragoye kandi risanga n’ubushobozi buremereye cyane dore ko uko bukeye n’uko bwije umuziki urushaho guhenda.
N’ubwo umuziki uhenda uwashoyemo imari ntabwo yunguka uwo munsi cyangwa se mu gihe cy’umwaka umwe gusa, ni ubushoramari bw’igihe kirekire ahanini butunga abyaje umusaruro amazina bubatse.
Kwibwira ko ukora indirimbo ebyiri ugahita winjiza akayabo ni ukwibeshya cyane niyo mpamvu byakabaye byiza kuba ufite undi murimo cyangwa ahandi ukura ubushobozi bukubeshaho nyuma y’umuziki.
Kumenya amakuru n’ibigezweho
Muri iki gihe utamenya aho Isi yerekeza aratakara cyane, yisanga hari ibyamusize, nk’umuhanzi byaba byiza kujyana n’aho Isi yerekeza kuko bigufasha kumenya uko uhanga udushya mubyo uririmba cyangwa ubutumwa ukwiriye gutanga.
Ikindi cyiza cyo kumenya amakuru ni uko bigufasha kumenya ahandi aho bageze uko bahanga ibyabo bituma nawe urushaho gukura mu mitekerereze.
Kwiga kwakira ibikuvugwaho n’abakunenga aho utakoze neza
Muri iki gihe aho imbuga nkoranyambaga zisigaye zituma benshi bisanzura bakavuga ibyo batekereza ku muntu babona kuburyo hari n’abadatinya kumutuka.
Ibi ni bimwe mu butuma bamwe mubazikoresha cyangwa ibyamamare usanga bibasiwe n’indwara y’agahinda gakabije ahanini usanga batewe n’izi mbuga nkoranyambaga bitewe no kutamenya uko bakira ibibavugwaho.
Ushaka gutera imbere yemera kugirwa inama no kumenya kwakira inenge ze cyangwa kumva amakosa yakoze akaba yayakosora n’umuhanzi rero ashobora gukosa bityo kugira ngo atere imbere agomba kugira ibyo akosora niba koko bitajyanye n’igihe.
