Urukundo Antony yaburiye I Manchester rwabaye rwinshi Muri Real Betis ashyiraho agahigo gakomeye
Umunya-Brazil Antony Matheus dos Santos yashyizeho agahigo ko kuba umwenda we ari wo urikugurishwa cyane ugereranyije n'abandi bakinnyi ba Real Betis.
Uyu mukinnyi Manchester United yamutije mu ikipe ya Real Betis yo muri Esupanye nyuma yuko kwitwara neza muri iyo kipe byari byanze gusa kuva yagera muri Real Betis ni we mukinnyi ukunzwe n'abafana ugereranyije n'abandi.
Kuva muri Mutarama ubwo Antony yatizwaga mu ikipe ya Real Betis mu kugurisha imyenda y'iyi kipe ni we urikuza imbere aho irenga 1000 imaze kugurwa, ibitari bisanzwe muri iyi kipe, Isco ni we mukinnyi wa Real Betis baguriraga imyenda cyane ariko ubu Antony ni we uri imbere. Imibare irerekana ko imyenda iriho izina rya Antony igera 1169 imaze kugurwa.
Ikinyamakuru cyo muri Esupanye Diario de Sevilla cyatangaje ko Antony ari we mukinnyi ufite igikundiro kidasanzwe mu ikipe ya Real Betis.
Kugeza ubu Antony amaze gukinira Real Betis imikino 11 muri iyo mikino yabashije gutsinda ibitego 4 ndetse anatanga imipira 4 yavuyemo ibitego. Amakuru akomeje gutangazwa n'Ibinyamakuru bitandukanye avuga ko uyu mukinnyi, ikipe ya Real Betis ishaka kumugura akaba umukinnyi wayo bikava mu kumutizwa gusa.
