Abanya-Kigali bungutse aho kwidagadurira binyuze mu mikino n'imyidagaduro itandukanye
Umujyi wa Kigali ukomeje kwaguka uko bukeye n’uko bwije ndetse n’ibikorwaremezo byiyongera buri munsi yaba ibya leta cyangwa iby’abandi bashoramari bigenga.
Kuri ubu abashoramari bakomoka muri Eritrea basanzwe batuye muri Leta Zunze Ubumwe za Amerika bubatse mu Mujyi wa Kigali bashoye imara mu Rwanda bubaka icyanya cyo kwidagaduriramo no kuruhukira binyuze mu mikino itandukanye, bise Kigali Sports Park, hahoze ari Sports View.
Iri shoramari riherereye mu Murenge wa Kagarama, Akarere ka Kicukiro, mu Mujyi wa Kigali, ryahurije hamwe imikino itandukanye.
Harimo imikino yo koga, Volleyball, Beach Volleyball, Mini-Football, Chess, imyitozo ngororamubiri ikorerwa muri gym, gukina igisoro ndetse n’izindi siporo zitandukanye.
Yonas Hagos, umwe mu bashinze Kigali Sports Park, avuga ko batekereje uyu mushinga nk’abantu basanzwe bakunda imikino, ariko by’umwihariko bakaba barakuruwe n’umutekano w’u Rwanda utuma uhashoye imari aticuza.
Ati: “Twahisemo u Rwanda kuko ari igihugu gitekanye kandi gifite isuku, itangarirwa na benshi, ku bijyanye n’ibibuga bizakinirwamo imikino itandukanye n’imyitozo ngororamubiri.”
Ubuyobozi bwa Kigali Sports Park buvuga ko Abanyarwanda bafunguriwe amarembo ku bibuga n’ibindi bikorwaremezo.
Ibi bikorwa remezo bizafungura kumugaragaro ku wa 13-14 Ukuboza 2025.
