U Rwanda na Botswana byasinye amasezerano mu nzego zirimo n’ubwikorezi bwo mu kirere no kudasoresha ibicuruzwa kabiri
Mu ruzinduko Perezida Kagame ari kugirira muri Botswana, rusize ibihugu byombi bishyize umukono ku masezerano y’ubufatanye mu nzego zitandukanye, zirimo ibijyanye no kudasoresha ibicuruzwa inshuro ebyiri, ubwikorezi bwo mu kirere n’ibindi.
Uru ruzinduko rw’iminsi ibiri rwa Perezida Kagame rwatangiye ku wa 6 Gicurasi 2026.
Perezida Kagame akigera ku Kibuga Mpuzamahanga cy’Indege cyitiriwe Sir Seretse Khama, Umukuru w’Igihugu yakiriwe na mugenzi we wa Botswana, Duma Boko.
Perezida Kagame na Perezida Boko, bagiranye ibiganiro byihariye, byakurikiwe n’ibindi byahuje abayobozi bakuru ba Botswana n’ab’u Rwanda.
U Rwanda na Botswana byashyize umukono ku masezerano y’imikoranire mu nzego zitandukanye arimo ayo kudasoresha kabiri ku bicuruzwa biva muri ibi bihugu.
Hashyizwe umukono ku masezerano yo gukuriranaho viza ku baturage b’ibihugu byombi, ajyanye n’ubwikorezi bwo mu kirere, mu bukungu, ubucuruzi n’ishoramari.
Perezida Kagame yashimiye mugenzi we wa Botswana, Duma Boko, wamwakiriye agaragaza ko umubano w’u Rwanda n’iki gihugu cyo mu majyepfo ya Afurika udashingiye ku bucuti ahubwo unagamije intego zihuriweho.
Ati “Ibyo bigaragarizwa mu buryo dukorana ndetse n’uburyo tuba dushishikajwe n’umusaruro ufatika.”
Perezida Kagame yavuze ko amasezerano yasinywe hagamijwe gukuraho imbogamizi abaturage bahura na zo, no gushyiraho uburyo bwiza butanga icyizere mu bijyanye n’ishoramari n’ubundi bufatanye.
Ati “Botswana yakomeje kugaragaza ibyo ubuyobozi bufite intego bushobora kugeraho. Uburyo mucungamo umutungo kamere wanyu by’umwihariko Diamants, bigaragaza uko mushyiramo ingufu mu kugumana agaciro kayo mukabihinduramo inyungu zifatika ku baturage.”
Perezida Kagame kandi yavuze ko ibikorwa bikomeje kugerwaho muri uru ruzinduko, by’umwihariko hagati y’inzego zitandukanye, bigaragaza amahirwe nyayo y’imikorere.
Perezida Kagame kandi yashimiye mugenzi we wanakomoje kuri iyi ngingo, agaragaza ko u Rwanda ruzakomeza guharanira ko ubufatanye hagati y’ibihugu byombi utera imbere ari na ko bugira ingaruka nziza ku baturage.
Yanashimiye iki gihugu ku mitegurire myiza y’imikino ya World Athletics Relays n’uburyo Botswana yayitwayemo neza, aho yatwaye umudali wa zahabu mu bagabo.
Urwego rw’u Rwanda rw’Iterambere (RDB) rwagiranye amasezerano n’urwa Botswana ndetse biteganyijwe ko mugoroba wo ku wa 6 Gicurasi 2026, Perezida Kagame yakirwa ku meza na mugenzi we, Duma Boko.
Ku wa 7 Gicurasi 2026 Perezida Kagame azatemberezwa Ikigo cya Botswana gicuruza Diamant kiri mu Murwa Mukuru, Gaborone.
Perezida wa Botswana, Duma Boko yasabye u Rwanda n’igihugu cye kwihutisha ishyirwa mu bikorwa ry’amasezerano y’ubufatanye ahuriweho, ashimangira ko hatagomba kubamo gutakaza igihe kuko ibihugu byombi biri mu rugendo rw’iterambere ryihuse.
Perezida wa Botswana, Duma Boko yashimiye Perezida Kagame wakiriye ubutumire bwe akagirira uruzinduko mu gihugu cye.
Duma Boko yavuze ko guhura kw’impande zombi atari ukugira ngo habeho ibiganiro bisanzwe bya dipolomasi gusa, ahubwo ko ari umwanya wo guhuza icyerekezo cy’iterambere n’ubufatanye.
