Rayon Sports itsinze AS Kigali icyizere cyo gutwara igikombe kiriyongera
Kuri uyu wa gatandatu ikipe ya Rayon Sports yari yakiriye AS Kigali mu mukino w'umunsi wa 21 wa shampiyona, umukino urangiye itsinze ibitego 2-1.
Nyuma yuko ikipe ya APR FC inganyije na Gasogi United ubusa ku busa amanota irushwa na Rayon Sports yiyongereye ava ku inota rimwe agera ku manota 4. Aya makipe yombi ahanganiye igikombe cya shampiyona y'uyu mwaka ndetse ubu imikino isigaye barigucungana.
Ibyabaye mbere yuko Rayon Sports yakira AS Kigali byatumye abantu bakomeza kubona ko uyu mwaka niramuka idakoze amakosa izegukana igikombe cya shampiyona baheruka mu mwaka wa 2019.
Mu mukino iyi kipe yakiriyemo AS Kigali byatangiye bitayorohera kuko Emmanuel Okwi ukinira AS Kigali ku munota wa 25 wonyine yari yamaze gufungura amazamu. Ikipe ya Rayon Sports yagerageje kwishyura iki gitego binyuze muri rutahizamu wayo Abeddy Biramahire ariko igice cya mbere cyarangiye AS Kigali ari yo iyoboye umukino n'igitego kimwe ku busa.
Mu gice cya kabiri nibwo Rayon Sports yaje kwishyura inabona igitego cy'insinzi, ku munota wa 64 nibwo Kanamugire Roger yatsindiye Rayon Sports igitego cyo kwishyura maze ku munota wa 74 Biramahire Abeddy ayitsindira igitego cya kabiri, umukino urangira ari ibitego 2-1.
Kuri ubu hasigaye imikino 9 aho Rayon Sports ya mbere yahise irusha APR FC iyikurikiye amanota 4.
Kuri ubu hagiye gukurikiraho imikino y'ikipe y'igihugu aho U Rwanda ruzakina imikino ibiri mu gushaka itike y'igikombe cy'Isi cya 2026, Rayon Sports na APR FC zikaba zizagaruka mu kibuga nyuma y'iyo mikino yose izaba muri iyi Werurwe.
