Perezida Kagame na Madamu Jeannette Kagame Bitabiriye Umukino w'Amavubi na Nigeria
Perezida Paul Kagame na Madamu Jeannette Kagame ni bamwe mu bitabiriye umukino wahuje ikipe y'igihugu y'u Rwanda na Nigeria wabereye muri Stade Amahoro kuri uyu wa Gatanu tariki 21 Werurwe 2025.
Ikipe y'Igihugu y'u Rwanda "Amavubi" itsinzwe na Super Eagles ya Nigeria ibitego 2-0 mu mukino w'Umunsi wa Gatanu wo mu Itsinda C ryo gushaka itike y'Igikombe cy'Isi cya 2026.
Victor Osimhen umaze iminsi witwara neza muri Galatasaray yongeye kwigaragaza kuri Stade Amahoro. Ibitego bye bibiri byabaye itandukaniro mu mukino wo kuri uyu wa Gatanu.
U Rwanda ruhise rujya ku mwanya wa gatatu n'amanota arindwi mu gihe Nigeria igize amanota atandatu ku mwanya wa kane.
Afurika y'Epfo yayoboye itsinda n'amanota 10 nyuma yo gutsinda Lesotho ibitego 2-0.
Amavubi azasubira mu kibuga ku wa Kabiri, tariki ya 25 Werurwe 2025, ahura na Lesotho hano muri Stade Amahoro.
Hagati aho nyuma y'igihe kitari gito Amavubi ayoboye Itsinda C, kuri ubu yageze ku mwanya wa gatatu n'amanota arindwi aho irushwa na Afurika y'Epfo ya mbere amanota atatu.
Benin iza ku mwanya wa kabiri n'amanota umunani aho ibi bihugu byombi bizahura ku munsi ukurikira, ubwo u Rwanda ruzaba rwakiriye Lesotho kuri Stade Amahoro.
