Harry Kane yikomye abapanga imikino y'ibihugu
Rutahizamu w'ikipe y'igihugu y'Ubwongereza Harry Kane yikomye abapanga imikino y'ibihugu avuga ko batajya baha agaciro abakinnyi.
Uyu mukinnyi w'imyaka 31 mu mikino ibiri Ubwongereza bwakinnye muri iyi Werurwe mu mikino yo gushaka itike y'igikombe cy'Isi yitwaye neza aho yanujuje ibitego 71 mu ikipe y'igihugu.
Iyo mikino yose bayikinnye mu gihe cy'iminsi ine gusa, ibyo bituma Kane avuga ko abapanga igihe iyo mikino ibera batajya bita ku bakinnyi. Muri Kamena hagati ya tariki 2 na tariki 10 hazongera hakinwe imikino y'ibihugu, imikino izaba nyuma y'iminsi itatu gusa hakinwe umukino wa nyuma wa UEFA Champions League.
Ikipe ya Bayern Munich Kane akinira iracyari muri iryo rushanwa ndetse bafite intego yo gutwara icyo gikombe cyane ko umukino wa nyuma uzabera kuri Stade yabo, Allianz Arena.
Bayern kandi uyu munsi iyoboye shampiyona y'Ubudage Bundesliga, izanitabira igikombe cy'Isi gihuza amakipe kizatangira tariki 15 Kamena kugera tariki 13 Nyakanga mu gihe baba bageze ku mukino wa nyuma.
Harry Kane utaratwaraho igikombe yagize ati '' Mvugishije ukuri twe abakinnyi ntibatwumva, buri wese aba ashaka ko irushanwa riba, bagashyiraho ibihembo ubundi bakabwira abakinnyi ngo bakine. Gusa uko byagenda kose ntakundi, nkunda umupira w'amaguru, ntabwo nzigera ninubira gukina. Ndatekereza ko iyo ubyitwayemo neza ufashijwe n'abatoza ndetse n'ikipe hari ubwo ubona umwanya muto wo kuruhuka.''
