Bukayo Saka muri bane bagiye kongera amasezerano muri Arsenal
Ikipe ya Arsenal iri mu biganiro n'abakinnyi bane kugira ngo bongere amasezerano, Bukayo Saka, William Saliba, Gabriel Magalhães ndetse na Leandro Trossard ibiganiro bigeze kure ngo basinye andi masezerano.
Kuri ubu Bukayo Saka waherukaga kongera amasezerano mu mwaka wa 2022, buri mwaka ahembwa miliyoni 10 z'amapawundi ndetse kuba ari umwe mu bafasha ikipe ya Arsenal kwitwara neza biri mu mpamvu bifuje kumwongerera amasezerano.
Mu bandi bakinnyi iyi kipe ishaka kongera amasezerano harimo William Saliba, Gabriel Magalhães ndetse na Leandro Trossard. Amasezerano basanzwe bafite azarangira mu mwaka wa 2027, Leandro Trossard niwe ufite azarangira 2026.
Ubwo mu ntangiriro z'uku kwezi William Saliba yavugaga ku bijyanye no kongera amasezerano yagize '' Kuri njye ndishimye cyane kuba ndi muri Arsenal, nshaka gukomereza hano.”
Muri iyi kipe kandi abakinnyi babiri Thomas Partey ndetse na Jorginho haribazwa niba na bo bazongera amasezerano.
Uyu mwaka w'imikino ikipe ya Arsenal yabashije gukomeza mu mikino ya UEFA Champions League aho muri 1/4 izahura na Real Madrid, ni mu gihe muri shampiyona y'ubwongereza bisa n'ibigoye kuba yatwara igikombe kuko Liverpool kugeza ubu irikuyirusha amanota 12 nyuma y'imikino 29 imaze gukinwa.
Amakuru meza kuri Bukayo Saka nkuko byatangajwe n'umutoza wa Arsenal, Mikel Arteta nyuma y'aka karuhuko k'imikino y'ibihugu azaba yagarutse ndetse hari icyizere ko azagaragara bahura na Real Madrid.
