Ihangana rirakomeje Paramount yongeye kuzamura igiciro cyo kugura Warner Bros ihanganiye na Netflix.
Paramount skydance yazamuye igiciro cyo kugura Warner Bros kigera kuri $31 ku mugabane, mu gihe Netflix nayo yari yamaze kumvikana kuyigura. Ibi bishobora gutuma hatangira ihangana rikomeye ku isoko ry’imyidagaduro muri Hollywood.
Paramount Skydance yongeye kuzamura igiciro yifuza kuguraho Warner Bros Discovery, mu gihe iyi sosiyete ihanganye na Netflix mu rugamba rwo kuyigarurira.
Warner Bros yatangaje ko Paramount yemeye kongera $1 ku mugabane, bituma igiciro kigera kuri $31 ku mugabane wishyurwa mu mafaranga ako kanya.
Ubuyobozi bw’iyi sosiyete bwavuze ko iki cyifuzo gishya gishobora gutuma ihangana rikomeza ibiciro bikaba byazamuka cyane, bityo bakaba bagiye gukomeza ibiganiro mbere yo gufata umwanzuro wa nyuma.
Mu Ukuboza kwa 2025, Warner Bros yari yemeye kugurisha amashami yayo akora filime na serivisi zo kuri internet zirimo HBO kuri Netflix, mu masezerano angana na miliyari $82 harimo imyenda.
Muri ayo masezerano, Warner Bros yari gusigarana ibindi bikorwa birimo imiyoboro ya televiziyo isanzwe ndetse na CNN, zikazahinduka sosiyete zigenga.
Nyuma yo guterwa utwatsi kenshi, Paramount yasubiye ku meza y’ibiganiro itanga $31 ku mugabane, ndetse yemera no gutanga miliyari $7 mu gihe amasezerano atagenda neza.
Yanemeye kwishyura miliyari $2.8 Warner Bros yagombaga guha Netflix mu gihe isezerano ryo kugurisha ryaseswa.
Umuyobozi mukuru wa Netflix, Ted Sarandos, aherutse gutangaza ko ibi byose ari inzira isanzwe y’isoko, agaragaza ko kompanyi ayoboye isanzwe igura mu buryo bwitondewe.
Paramount Skydance ishyigikiwe n’umunyemari Larry Ellison, ikaba iyobowe n’umuhungu we David Ellison.
Iyi sosiyete imaze igihe igaragaza ko ishaka kwagura ibikorwa byayo muri Hollywood no guhinduka igihangange mu myidagaduro ku rwego mpuzamahanga.
Abasesenguzi bavuga ko Warner Bros ishobora kuba iri gukoresha iri hangana mu kuzamura igiciro kurushaho, kuko hari abatekereza ko gishobora no kugera kuri $33 ku mugabane mbere y’uko hafatwa icyemezo cya nyuma.
Abadepite muri Leta Zunze Ubumwe za Amerika bagaragaje impungenge ku bijyanye no kwiharira isoko ndetse n’ingaruka ku nganda z’imyidagaduro, cyane cyane ku bijyanye n’ibiciro bya serivisi zo kureba filime kuri internet.
Ubuyobozi bwa Warner Bros bwatangaje ko buzakomeza ibiganiro mbere yo gufata umwanzuro wa nyuma ku masezerano buzahitamo.
