Abatoza bo muri Afurika bahembwa menshi bananiwe kwitwara neza
Mu gihe muri uku kwezi hakinwe imikino ibiri mu gushaka itike y'igikombe cy'Isi cya 2026, hari abatoza bitwaye nabi kandi bari mu bahembwa menshi n'ibihugu batoza.
Rigobert Song-Central African Republic
Umunya-Cameroon Rigobert Song ni umwe mu batoza bahembwa atari make n'ikipe y'igihugu ya Central African nubwo na we kubahesha insinzi bitakunze.
Uyu mutoza imikino ibiri yatoje muri uku kwezi mu gushaka itike y'igikombe cy'Isi ntiyitwaye neza, umukino wa mbere batsinzwe na Madagascar ibitego 4-1 mu mukino banayakiriyemo mu rugo, undi mukino banganyije na Mali ubusa ku busa.
Buri kwezi Rigobert Song ahembwa ibihumbi 7 by'amayero, kugeza ubu Madagascar ikaba ibarusha amanota 5 mu gihe hasigaye imikino 5.
Benni McCarthy - Kenya
Umunya-Afurika y'Epfo Benni McCarthy yagizwe umutoza w'ikipe y'igihugu ya Kenya Harambee Stars, uyu mutoza imikino ibiri yatoje Kenya muri iyi Werurwe mu mikino yo gushaka itike y'igikombe cy'Isi ntiyitwaye neza nubwo ari mu batoza bahembwa menshi muri Afurika.
Kenya yabanje kunganya na Gambia ibitego 3-3 nyuma iza gutsindwa na Gabon ibitego 2-1 mu mukino w'uyu mutoza wa mbere mu rugo bakiniye kuri Nyayo Stadium, kugeza ubu Harambee Stars mu itsinda ryayo irimo C, ifite amanota 6 itsinda riyobowe na Ivory Coast n'amanota 16.
McCarthy buri kwezi ahembwa ibihumbi 58 by'amayero nubwo umusaruro kugeza ubu ari nkene mu ikipe y'igihugu ya Kenya.
Aliou Cisse-Libya
Tariki 20 Werurwe nibwo Aliou Cisse yatoje umukino we wa mbere nk'umutoza w'ikipe y'igihugu ya Libya, ntiyatangiye neza kuko yatangiye anganya na Angola igitego 1-1. Umukino we wa kabiri yatsinzwe na Cameroon ibitego 3-1.
Gutakaza amanota 5 byatumye Libya ijya ku mwanya wa gatatu icyizere cyo kubona itike gikomeza kuyoyoka, Aliou Cisse buri kwezi ahembwa ibihumbi 76 by'amayero. Intangiriro ntizamubereye nziza mu ikipe y'igihugu ya Libya.
Ni kenshi usanga hari abatoza bahembwa menshi hano muri Afurika ariko wareba umusaruro wabo ukabura aho bitwaye neza. Imikino yo gushaka itike y'igikombe cy'Isi izongera gukinwa muri Kamena aho ibihugu bimwe ubu bifite amahirwe yo kubona iyo tike mu gihe hari ibindi byo bisa nkaho icyizere cyamaze kurangira.
