Cyusa Ibrahim na Layan Mpano bahuje amaboko mu ndirimbo ‘Rusanga n’Izayo’
Umuhanzi mu njyana gakondo, Cyusa Ibrahim na mugenzi we Mpano Layan bahurije Imbaraga mu ndirimbo ‘Rusanga n’Izayo’ ishyigikira gakondo n’urukundo rw’igihugu.
Cyusa Ibrahim aganira Isibo TV Radio yagarutse ku cyatumye ahitamo gukorana na Mpano Layan avuga ko “Ari umuhanzi mwiza kandi akora gakondo y’umwimerere itavangiye, kandi ni muto ufite ahazaza hakomeye muri iyi gakondo.”
Indirimbo “Rusanga n’Izayo” ifite ubutumwa bw’urukundo rw’igihugu dore ko izina Rusanga ribitse amateka y’ubutwari n’umuco wo guharanira ubumwe.
Yakomeje agira ati “Rusanga n’izayo ni indirimbo yo hambere irimo gukunda igihugu. Rusanga yari impfizi y’umwami, iyo ingabo zajyaga ku rugamba Rusanga yagumaga mu marembo itegereje ko ingabo zitahuka ngo izisanganire nk’ikimenyetso cy’intsinzi y’urugamba.”
Uyu mwanya w’ibikorwa bya Rusanga, nk’uko umuhanzi abivuga, ni isomo ry’uko gukunda igihugu bisaba kwihangana, gukorera hamwe no gushyigikirana mu bihe bikomeye.
Cyusa Ibrahim avuga ko gukorana na Layan Mpano byari kimwe mu bikorwa byo guteza imbere umuziki gakondo, cyane cyane mu gihe guhuza imbara muri iyi njyana gakondo ari bicye.
Indirimbo “Rusanga n’Izayo” yakozwe n’itsinda rikomeye rihuza ubuhanga mu muziki no mu mashusho. Yakozwe mu buryo bw’amajwi na Jimmy Pro, inononsorwa na Bob Pro. Ni mu mashusho yakozwe na Shimwa Clement.
