Cristiano Ronaldo yasezeye gukinira ikipe y'igihugu ya Portugal
Umunyabigwi Cristiano Ronaldo yatangaje ko asezeye burundu gukinira ikipe y'igihugu ya Portugal, asoza urugendo rw'amateka rwamugize umwe mu bakinnyi bakomeye mu mateka y'umupira w'amaguru ku Isi ndetse hari n'abamufata nka nimero ya mbere. Uyu mukinnyi w'imyaka 41 y'amavuko yabitangaje ku wa Kane, tariki ya 5 Ugushyingo 2026, abinyujije muri videwo ndende yashyize kuri Instagram, aho yasomeye abakunzi be ubutumwa bw'isezera rye.
Mu butumwa bwe, Ronaldo yavuze ko igihe kigeze ngo asubize ikipe y'igihugu nimero 7 yari amaze imyaka 23 yambara. Ati: “Umunsi urageze ngo nsubize umupira nimero 7 w'ikipe y'igihugu cyacu. Sinigeze ntekereza ko ari uwanjye jyenyine, ariko mu gihe cy'imyaka 23 nagize amahirwe n'inshingano zo kuwambara.”
Ronaldo yanditse amateka akomeye muri Portugal, aho yakiniye ikipe y'igihugu imikino 234, akaba ari we mukinnyi umaze kuyikinira imikino myinshi kurusha abandi. Yanayitsindiye ibitego 146, na byo bikaba ari umubare utaragerwaho n'undi mukinnyi mu mateka y'ikipe y'igihugu.
Ibihembo bikomeye yegukanye mu rugendo rwe rwo gukinira Portugal birimo igikombe cya Shampiyona y'u Burayi (UEFA European Championship) yatwaye mu 2016. Yanagize uruhare mu gufasha Portugal kwegukana UEFA Nations League mu 2019 no mu 2025.
Nubwo yanditse ayo mateka, mu myaka ya vuba umubano we n'ikipe y'igihugu watangiye kugenda uzamo agatotsi, ahanini bitewe n'uko umusaruro we mu kibuga wagendaga ugabanuka.
Uko imyaka yagendaga yiyongera, Ronaldo yakomeje guhabwa umwanya mu bakinnyi babanzamo, nubwo umusaruro we wari umaze kugabanuka, ibintu byatumye bamwe mu bafana batangira kutishimira uko byari bimeze.
Nyuma y'Igikombe cy'Isi cyabereye muri Amerika ya Ruguru muri iyi mpeshyi, uyu rutahizamu yanagiranye ubwumvikane buke n'umutoza mushya w'ikipe y'igihugu, Jorge Jesus.
Mu burakari bwinshi, Cristiano yavuye mu mwiherero w’ikipe y'igihugu yiteguraga imikino ya UEFA Nations League muri Nzeri 2026, nyuma yo kutifashishwa mu mukino wahuje igihugu cye na Norvège ndetse akaza kumenya ko atari kubanza mu kibuga mu wari gukurikiraho na Danemark.
Icyo gihe Ishyirahamwe ry’Umupira w’Amaguru muri Portugal, FPF, ryamuhanishije kumara iminsi 30 adakina ku bwo kuva mu mwiherero w’Ikipe y’Igihugu atabiherewe uburenganzira. Yanaciwe ibihumbi 372 Frw [Amayero 255].
Iyi nkuru yo gusezera kwa Cristiano Ronaldo ije nyuma y'igihe gito mukeba we muri ruhago, Lionel Messi, na we atangaje ko asezeye gukinira ikipe y'igihugu ya Argentina.
