Umucuruzi wibiyobyabwenge El Mencho yashyinguwe mu isanduku ya Zahabu
Rimwe mu mabandi akomeye mu gihugu cya Mexique, Nemesio Oseguera Cervantes uzwi nka El Mencho, uherutse kwicwa na guverinoma ya Mexique, yashyinguwe mu isanduku ya zahabu.
Ibi byabaye ku wa 2 Werurwe 2026 ubwo yajyaga gushyingurwa mu cyubahiro.
Ku wa 22 Gashyantare 2026 ni bwo inzego z’umutekano za Mexique zatangaje ko zishe El Mencho, rimwe mu mabandi akomeye yahigwaga muri iki gihugu.
El Mencho yari ayoboye itsinda ry’amabandi rizwi nka ‘Jalisco New Generation Cartel: CJNG’, rimwe mu matsinda akomeye azwiho ubugizi bwa nabi bukomeye anacuruza ibiyobyabwenge muri Mexique n’ahandi ku Isi.Yiciwe mu gitero yagabweho n’ingabo za Mexique ku bufatanye na Leta Zunze Ubumwe za Amerika, cyane ko Amerika na yo yamuhigaga, yaranashyizeho igihembo cya miliyoni 15$ ku muntu uzatanga amakuru yaho El Mencho aherereye cyangwa uko yaboneka.
Urupfu rwa El Mancho ariko ntirworoheye Mexique kuko abarwanyi ba CJNG bishoye mu mihanda y’i Jalisco n’intwaro zihambaye n’ibikoresho bya gisirikare, batwika imodoka bahasanze nta kuvangura, batwika n’ibikorwaremezo.
Byageze aho ibindi bihugu bitangira gusaba abaturage babyo batuye muri Mexique kuguma mu bwihisho kugira ngo batagwa mu mirwano y’abo barwanyi.
Guverinoma ya Mexique kandi yohereje ingabo 9500 mu mujyi wa Jalisco ngo zijye guhangana n’ayo mabandi.
Uyu mugabo yaje gushyingurwa ariko arinzwe ku rwego rwo hejuru kugira ngo hirindwe ko hakongera kuza iyo myivumbagatanyo.
Ibinyamakuru byo muri iki gihugu bigaragaza ko El Mancho ashyingurwa n’abantu bake ugereranyije n’uburyo andi mabandi yapfuye yashyinguwe, gusa bigaragaza ko hari indabo nyinshi cyane kandnini n’abaje gushyingura bari bipfutse mu maso.
